AstraZeneca ka reaguar pas vendimit të autoriteteve daneze për ta refuzuar vaksinën e prodhuar nga kompania britaniko-suedeze. AstraZeneca tha se e respekton vendimin e rregullatorëve shëndetësorë të Danimarkës, pas rasteve të mpiksjes së gjakut.
Danimarka u bë shteti i parë evropian që e ndaloi plotësisht vaksinimin me dozat e Oxford-AstraZeneca për koronavirusin.
Në një deklaratë për agjencinë e lajmeve Reuters, AstraZeneca thotë: “Ne e pranojmë dhe e respektojmë vendimin e marë nga Sundhedsstyrelsen (agjencia e shëndetit) në Danimarkë.”
Kompania shton se çdo shtet e ka vetë në dorë për të zgjedhur dhe vendosur në lidhje me programin e vaksinimit, bazuar në kushte lokale.
“Ne do të vazhdojmë të bashkëpunojmë me rregullatorët dhe autoritetet lokale në mënyrë që të sigurojmë të gjitha të dhënat në dispozicion për të informuar vendimet e tyre”, thotë kompania.
Mbikëqyrësi i BE-së për barnat Agjencia Evropiane e Barnave javën e kaluar njoftoi një lidhje të mundshme me mpiksjen por tha se rreziku i vdekjes nga Covid-19 ishte shumë më i madh.
