Jasir Asani është një nga futbollistët me më shumë klas në futbollin shqiptarë, një lojtarë i aftë të ndryshojë i vetëm balancat në një ndeshje. Sulmuesi u rikthye këtë sezon sërish në shtëpinë e tij, tek Partizani, pas një aventure të shkurtër në Suedi.
Në një intervistë për emisionin “Sport Neës” në “Neës24”, Asani foli për ecurinë e të kuqve këtë sezon, objektivat e klubit dhe të ardhmen. Në pritje të një ftese nga përfaqësuesja kuqezi, Asani kërkon të mbyll me sukses këtë vit për të diskutuar më pas me drejtuesit e Partizanit të ardhmen e tij:
Keqardhje për eliminimin në Kupë? Ndaj Laçit dhamë maksimumin, e merituam fitoren por siç e pamë të gjithë gjërat shkuan ashtu si shkuan dhe nuk arritëm të kualifikoheshim.
Partizani, pretendent për titull? Te Partizani titulli kampion është objektivi primar që në fillimin e sezonit. Jemi në rrugën e duhur dhe na duhet t’i marrim ndeshjet një nga një për të arritur objektivin.
Rivalët e Partizanit për titull– Ka shumë ekipe të mira si Tirana, Vllaznia, Laçi por jam i mendimit që e kemi vetë në dorë nëse do të shpallemi kampionë apo jo.
E ardhmja– Kam akoma kontratë, nuk mund të them që mund të ikim. Tani jam fokusuar vetëm te Partizani. Të fitojmë titullin kampion, më pas të ulemi me presidentin dhe të flasim.
Trajneri Daja- Kam mendim të mirë për trajnerin. Na ka bërë si një familje, që kur ka ardhur, kemi një raport të mirë. Na thotë që të japim maksimumin dhe të mos mendojmë për ditët e nesërme, na thotë që jemi lojtarët më të mirë dhe e kemi treguar veten. Na kanë munguar shumë tifozët, na motivojnë shumë, shpresoj që të kthehen shumë shpejt, se na duhet mbështetja e tyre.
Sjellja në fushë- Jam me mentalitet kampioni, çdo ndeshje kam qejf të fitoj, kështu jam rritur. Nuk jam rebel.
Kombëtarja– Unë besoj se e kam merituar ftesën nga Kombëtarja, por trajneri dhe të tjerët e dinë më mirë. Unë duhet ët jap më të mirën tani dhe mendoj se ftesa nga Kombëtarja do vijë.
