Kandidati për deputet në Qarkun e Lezhës, Iliaz Shehu, i ka drejtuar një thirrje policisë për të liruar aktivistët e Lëvizjes VETËVENDOSJE, që iu bashkuan qytetarëve të Thirrës në protestën e tyre kundër HEC-it dhe kundër të gjithë HEC-eve nëpër Shqipëri, që në aleancë abuzive me qeverinë kanë përvetësuar pasuritë publike dhe po i shkatërrojnë ato.
Shehu shprehet se pas protestës, dhjetra kilometra larg vendit ku ajo u zhvillua, Policia e Shtetit i ka ndjekur aktivistët në mënyrë tinëzare, duke i ndaluar më tej dhe duke i shoqëruar për në Komisariatin e Lezhës.
“Ky pushtet nuk ka qenë kurrë më gabim se tani, kur krijon idenë se mund të na stepë me shoqërime dhe arrestime. Kjo ne na bën edhe më të vendosur për ta vazhduar më tej atë që kemi nisur.
Aktivistët janë krenaria jonë, të guximshëm, të fortë, të mençur e të pjekur; të vendosur përballë një pushteti në ikje, të panikosur, e që për të fshehur frikën ekspozon muskujt.
Nga ky pushtet nuk presim asgjë. Kurse Policisë së Shtetit i bëjmë thirrje që të mos vendoset në funksion të këtij pushteti”, thuhet në reagimin e kandidatit për deputet.
