Gazetari i rrjetit Birn, Gjergj Erebara, është shprehur sot se kontrollorët e aeroportit të Rinasit janë arrestuar gjatë natës dhe janë mbajtur në kushte mjerimi.
“Janë mbajtur gjatë gjithë natës në komisariat. Në këmbë, pa të drejtë që të flejnë në kushte të mjerueshme. Ata nuk janë militantë politik që mund ti zëvendësosh lehtë.
Këto persona të specializuar kushtojnë 4 vite trajtim dhe mijëra euro. E që ky problem të zgjidhet sa më shpejt, duhet që të ulen e të komunikojnë, jo t’i konsiderojnë armiq të popullit apo grusht shteti”, tha Erebara i ftuar në një studio televizive.
Gazetari i njohur e konsideron normale një veprim të tillë të kontrollorëve, pasi është e drejta e tyre që të ngrenë zërin kur u ulet paga. Erebara shtoi se është një protestë normale, por është krim mënyra se si kjo çështje po trajtohet.
