Partizani gjendet në një pozitë të mirë në tabelën e klasifikimit në Superiore por kjo jo domosdoshmërisht falë formës së skuadrës. Ashtu si të kuqtë edhe rivalët kanë problemet e tyre çka ka bërë që 5 skuadrat e para të ndahen vetëm nga 5 pikë.
Gjithsesi pavarësisht të gjitha problematikave të cilat kanë nisur që në muajt e verës, kur kishin me merkato të bllokuar, e duke vazhduar më pas me disa rezultate jo të mira e me problemet me kontratat së fundmi, të besuarit e Ilir Dajës janë ende në vendet e para, ku synojnë patjetër fitimin e titullit kampion.
Edhe në prononcimin e tij, mesfushori Rron Broja pranoi se nuk duhet të ketë më hapa falsë dhe duke filluar që me ndeshjen kundër Bylisit, do të nisë vrulli final drejt titullit. Por, për të nisur këtë vrull final, Partizanit i duhet të zgjidhë problemin kryesor: mungesën e golit!
E për të zgjidhur këtë shthepërsi para porte, Daja pritet të aktivizojë emrat “big” që ka në ekip. Emri më i madh, pa diskutim, që është Ferhan Hasani. “Buba” nuk ka luajtur thuajse aspak për “demat” që nga transferimi i tij në janar, por dy javët pushim për shkak të kombëtareve dhe minutat që luajti kundër Vllaznisë i kanë bërë mirë fantazistit, i cili pritet që menjëherë të marrë rolin e liderit në ekip.
Hasani pritet të aktivizohet në të majtë të sulmit, por me spostimin e tij drejt qendrës dhe me pasimin final që e karakterizon, do të jetë rreziku numër një për kundërshtarët. Jasir Asani mund të rreshtohet në krahun tjetër të sulmit.
Formacioni i mundshëm i Partizanit: 4-3-3: Hoxha, Mala, Bitri, Belica, Hakaj, Murataj, Broja, Bardhi, Asani, Cinari, Hasani
