Gjykata e Tiranës ka dënuar me 5 vite burg Vladimir Gjutën, i arrestuar me një arme me vete pranë selisë së PS në shkurt 2020. Gjuta u shpall fajtor për armëmbajtje pa leje.
Vendimi i gjykatës u dha në përputhje me kërkesën e prokurorisë.
Vladimir Gjuta u arrestua në Shkurt 2020, pasi u kap para selisë së PS, me një armë pa leje dhe me një shumë të madhe parash.
Gardistët kishin krijuar dyshime për lëvizjet e Gjutës, i cili mbante një kapele dhe një çantë ku kishte afro 100 mijë Euro. Ndërsa pistoleta iu gjet në brez. Ajo kishte një fishekë në gojë, gati për të qëlluar dhe karikatorin e mbushur. Vetë Gjuta ka deklaruar se ndodhej në zonë për të dorëzuar paratë në një exchange pranë selisë së Partisë Socialiste dhe se nuk kishte lidhje me prezencën e eksponentëve të lartë socialistë, të pranishëm në seli. Edhe armën, ai u tha oficerëve të policisë, se e kishte marrë me vete për shkak të shumës së parave që kishte për të dorëzuar.
Vladimir Gjuta u arrestua edhe në Janar 2020 pasi kishte rrahur me çekiç kushëririn e tij duke i shkaktuar dëmtime të rënda në fytyrë. Vladimir Gjuta po ashtu u arrestua si i dyshuar për hedhjen në erë me tritol të farmacisë së babait të ish–ministrit të Brendshëm Saimir Tahiri, në vitin 2015.
