Një tjetër mjek në Tiranë shprehet se është pushuar nga puna pas qëndrimeve kundër që ka mbajtur në kohë të ndryshme ndaj politikave shëndetësore të maxhorancës.
Bëhet fjalë për Dr.Sinan Manjani, mjek familje, i cili punon në Qendrën Shëndetësore nr. 10.
Lajmin e ka dhënë vetë ai përmes një postimi në rrjetet sociale.
“Të dashur miq, dhe të afërm kolegë dhe të nderuar pacientë, pas 27 vitesh pune, më pushojnë nga puna për bindje politike”, shkruan mjeku në FB-un e tij.
Lidhur me rastin në fjalë ka reaguar edhe eksperti i Shëndetit Publik Dr. Erion Dasho.
“Ky sistem i ç’akorduar shëndetësor që drejtohet nga piktorë, kimistë, klarinetistë dhe balerina sot ka larguar nga puna një tjetër bluzë të bardhë, Dr. Sinan Manjanin! Bluzat e bardha që heshtën apo protestuan me gjysmë zëri në dhjetor kur pushohej Dr. Allkja, janë sërish të obliguar të protestojnë në mbrojtje të një tjetër kolegu! Dr. Sinani! Qëndrojmë përkrah teje!“, shkruan Dasho.
Rasti i mjekut është i ngjashëm me atë të mjekut Ilir Allkja, i cili u pushua disa muaj më parë nga puna si mjek në QSUT, për shkak të qëndrimeve të tij në kundërshtim me politikat shëndetësore të qeverisë kryesisht gjatë pandemisë.
