Real Madrid ka arritur një fitore të rëndësishme 3-1 përballë Liverpoolit, takim ky i vlefshëm për çerekfinalen e Ligës së Kampioneve.
Skuadra e Zidane e mbylli pjesën e parë në avantazh 2-0 ndaj anglezëve. Fillimisht shënuan me anë të Vinicius Jr pas një asisti spektakolar të mesfushorit Toni Kroos. Diçka e telekomanduar për Vinicius Jr i cili pasi e stopon me gjoks arrin që të kalojë edhe mbulimin e dy mbrojtësve të Liverpool, të hutuar, duke mposhtur Alisson më pas dhe dhuruar avantazhin djemve të Zidane.
Shifrat u dyfishuan në minutën e 36-të me anë të Asensios. Edhe në këtë gol mbrojtja “reds” është totalisht e përgjumur. Këtë herë gabimi vjen si asist nga Arnold, i cili në tentativë për ta kthyer të portieri me kokë i pason Asensios, që pasi kalon me parabolë Alisson, e ka të lehtë ta depozitojë topin në rrjetë për 2-0.
Në pjesën e dytë, Liverpool arriti të reagonte me anë të Mohammad Salah i cili shkurtoi diferencat në minutën e 51-të. Në fije të pozicionit jashtë loje, egjiptiani gjen devijimin e duhur dhe shënon për “reds” pas një aksioni të bukur nga krahu për anglezët.
Gjithsesi Reali do të kundërpërgjigjej shpejt teksa në minutën e 65-të, Vinicius do të shënonte golin e dytë personal dhe të tretin për skuadrës duke i çuar shifrat në 3-1. Modric nis një pasim të saktë brenda zone dhe një penallti e lëvizsshme për brazilianin që godet te shtylla e parë e mbrojtur nga Alisson. Portieri brazilian niset si me vonesë dhe nuk arrin ta mbajë ose devijojë topin në këndore.
Rezultati nuk do të ndryshonte deri në fund, me “Los Blancos” që do të udhëtojnë në Angli me një rezultat komod.
https://streamable.com/d57368
https://streamable.com/a43m0b
https://streamable.com/qgcpgl
