Nga Boldnews.al
Një faturë e rëndë u vjen shqiptarëve për të paguar nga xhepat e grisura dhe djersa e tyre që u bulzon edhe mbi rrobat e grisura. Plot 110 milionë euro do të dëmshpërblehet
Françesko Beketi për shkak të mbylljes së televizionit “Agon Channel” në vitin 2015, nga dyshja Rama-Veliaj. Gjykata e Arbitrazhit Ndërkombëtar, me seli në Uashington, vendosi në favor të Beketit duke i sjellë qytetarëve tanë një faturë të tmerrshme. Padyshim që kjo nuk prek as Ramën, as ministrin e tij Ahmetaj dhe as kryebashkiakun e Tiranës Erion Veliaj. Për ta është një “kafe” e zakonshme, por për taksat e shqiptarëve është barrë e rëndë, faturë e frikshme që vjen pikërisht nga makutëria e Ramës dhe Veliajt për të kontrolluar çdo zë kritik.
Në vendimin e dhënë gjykata, janë administruar disa prova të rënda dhe tërësisht të patolerueshme kur në mënyrë direkte, Erion Veliaj dhe Sekretari i Përgjithshëm i Kryeministrisë Ëngjëll Agaçi, u futën në rolin e djallit të vërtetë. Veliaj u shkruante drejtuesve të Agon Channel se: “Unë nuk e kuptoj pse po ma bën këtë, ju po më detyroni të jem armiku juaj! E gjithë qeveria do të jetë armiku i [Beçhetti] pa asnjë arsye“ – shkruante Veliaj në atë kohë. U pezmatua Veliaj, ky djalosh i ardhur nga Mjafti se përse “Agon Channel” kishte nxjerrë një kronikë ku theksonte se Veliaj kishte organizuar dy dasma.
Nga ana tjetër, Engjëlli i Ramës, ose “dora e zezë” që tërheq fijet e drejtësisë së re, takon Beketin dhe ia thotë hapur në formë shantazhi se: “Nuk është ide e mirë t’i bësh opozitë shtetit”, duke i ‘sugjeruar’ gjithashtu që të filiste me drejtorin e përgjithshëm të një televizioni rival. Këtë e konstaton edhe gjykata ku shprehet: “Që në fillim të hetimeve për pastrim parash, një përfaqësues i qeverisë i tha zotit Beçhetti në mënyrë eksplicite se duhet të fliste me një nga konkurrentët e tij, nëse dëshironte të kuptonte se pse investimet e tij ishin nën hetim, dhe që nuk ishte një ide e mirë t’i bënte opozitë shtetit,” argumenton Gjykata e Arbitrazhit.
Po sot të vetmit që nuk shqetësohen nga kjo marrinë e tmerrshme që varfëron edhe më shumë të varfërit shqiptarë janë dyshja Rama-Veliaj, prej të cilëve e kemi edhe këtë faturë të rëndë. Veliaj u prek se dolën pamjet e dy dasmave luksoze të tij, një në Kalanë e Gjirokastrës që e ktheu në oborrin personal dhe tjetra në një kompleks të madh luksoz në periferi të Tiranës ku bëhej aheng, piqej mish i përzgjedhur qingji dhe pihej verë e shtrenjtë.
Për të dyja këto dasma me fatura të fryra, Veliaj tha se i kishte bërë me paratë e kursimit nga nëna pensioniste. Po sot faturën prej 110 milionë eurosh kush do e paguajë? Sigurisht jo Veliaj, pasi vetë ai mund të bëjë edhe “dasmën e tretë” pa pyetur kënd, por pensionistët shqiptarë, të papunët, ai që merr ndihmë ekonomike, e madje edhe 40 % e popullsisë që jeton në varfëri ekstreme. Po as Engjëlli i Ramës nuk do tia dijë, sepse është i zënë me fushatën dhe mbi të gjitha pa harruar tërheqjet e fijeve që lëvizinin “marionetat” e drejtësisë së re!
