Komisioni i Pavarur i Kualifikimit shkarkon nga detyra prokurorin e Tiranës, Genci Qana. Vendimi u njoftua këtë të Mërkurë nga trupa gjykuese e kryesuar nga Valbona Sanxhaktari, me anëtare Etleda Çiftja dhe relatore Xhensila Pinen.
Qana zhvilloi seancën dëgjimore më 9 Mars, kur u vunë në pah probleme me pasurinë dhe figurën e prokurorit.
Prokurori u përball në Komisionin e Pavarur të Kualifikimit me dyshime mbi burimin e ligjshëm për disa prej pasurive të tij dhe denoncime për çështjet që kishte hetuar, përfshi pushimin e hetimeve për një aksident me vdekje në punë.
Genci Qana e ka filluar karrierën në sistemin e drejtësisë në vitet ’90. Ai ka punuar si prokuror i Prokurorisë së Krimeve të Rënda në vitet 2003-2007 dhe prokuror i Prokurorisë së Tiranës në vitet 2008-2020.
