Dy të rinj janë arrestuar nga policia e Beratit, ndërsa një i tretë është shpallur në kërkim, pasi kanë kundërshtuar efektivët.
E.M., 21 vjeç dhe X.M., 27 vjeç, të dy banues në lagjen Uznovë, u vunë në pranga, ndërsa u shpall në kërkim E.L..
Aksioni
Policia njoftoi se, pas informacioneve të marra se këta shtetas posedonin lëndë narkotike në mjetin e tyre, nga ana e Policisë, në aksin rrugor Poliçan-Berat, në vendin e quajtur “Qafa e mullirit” u organizua puna për ndalimin e tyre.
Personat e lartpërmendur nuk i janë bindur urdhrit të punonjësve të Policisë për të ndaluar, i kanë kundërshtuar ata duke goditur me mjetin e tyre mjetin e Policisë dhe më pas janë larguar nga vendngjarja.
Menjëherë shërbimet e Policisë u vunë në ndjekje për kapjen dhe ndalimin e tyre. Gjatë ndjekjes, konstatuan se këta shtetas kanë hedhur nga mjeti i tyre një sasi lënde narkotike cannabis sativa, e cila u sekuestrua në cilësinë e provës materiale.
Në fund, dy persona u arritën të ndaloheshin, ndërsa i treti i cili arriti të arratisej, u shpall në kërkim.
