Rusia dhe Mali i Zi nuk gabojnë në ndeshjet shtëpiake, duke siguruar fitoret e dytë radhazi në takimet eliminatore të Katar 2022.
Kombëtarja ruse mposhti Slloveninë 2-1 në Sochi. Të tre golat e ndeshjes u realizuan në fraksionin e parë të ndeshjes me autor të golave, Artem Dzyuba 26’, 35’ ndërsa për Slloveninë shkurtoi diferencat me anë të Josip Ilicic në minutën e 36-të.
Mali i Zi triumfoi 4-1 përballë modestëve të Gjibraltarit, duke siguruar një tjetër fitore pas asaj kundër Letonisë në transfertë. Fatos Beqiraj, sulmuesi me origjinë shqiptare i Bnei Yehuda, zhbllokoi ndeshjen në minutën e 25-të.
Miqtë barazuan falë një penalltie katër minuta më vonë, por Mali i Zi shënoi edhe tre gola të tjerë deri në fundin e ndeshjes. Simic, Tomasevic dhe Stevan Jovetic kompletuan suksesin me “poker” të kombëtares ballkanike.
