Instituti Kombëtar i Shëndetësisë Publike njoftoi të shtunën, se në Kosovë, 11 persona kanë vdekur pas infektimit me koronavirus.
“Rastet e vdekjes janë nga komunat: Skënderaj 3 raste (83, 74, 69 vjeç), Prishtinë 2 raste (85, 70 vjeç), Gjakovë 1 rast (79 vjeç), Klinë 1 rast (62 vjeç), Lipjan 1 rast (69 vjeç), Pejë 1 rast (76 vjeç), Prizren 1 rast (36 vjeç), Suharekë 1 rast (63 vjeç)”, thuhet në njoftimin e IKSHPK-së.
Sipas raportit ditor, nga 4.371 testime, janë regjistruar edhe 873 raste të reja me COVID-19. Kjo shifër paraqet numrin më të lartë të infektimeve ditore, të regjistruara më 2021.
Në 24 orët e fundit, COVID-19 e kanë mposhtur edhe 544 pacientë.
Që prej 13 marsit 2020, e deri më 27 mars, 2021, Kosova ka regjistruar 87.067 raste me koronavirus.
Prej tyre, 1.830 raste kanë përfunduar me fatalitet, ndërkaq, 71.813 persona janë shëruar. Raste aktive janë 13.424.
