Nga Boldnews.al
Në fundin e mandatit të dytë, kryeministri Edi Rama i ka varur shpresat për një mandat të tretë tek “vëllai i gjetur” Rexhep Taip Erdogan. Pasi siguroi “spitalin portativ” në Fier, me investim direkt të qeverisë turke, Rama mori edhe 192 mijë vaksina kineze, por të prodhuara në Turqi. Kjo është forma që kryeministri ynë më shumë se vaksinën po shpërndan pluhur propagandistik, me shpresën se do të mbulojë sytë e qytetarëve dhe ti turbullojë aq shumë sa të votojnë atë për një mandat të tretë.
Nuk është më aspak e vështirë të lexohet politika e Ramës, ku vetëm pak para se të nisej drejt turqisë ku e prisnin dumdumet me vaksina në Aeroportin e Stambollit, Rama kritikoi Bashkimin Evropian. Në fakt fjalët ishin të tijat, por teksti duket sikur kishte ardhur i gatshëm nga Ankaraja zyrtare.
Në vendin tonë ka edhe qytetarë që mendojnë se për aq kohë sa Turqia investon, nuk ka asgjë të keqe, pasi kjo i sjell vendit zhvillim. Në të vërtetë ajo që po ndodh nuk është zhvillim, por një vasalitet që Turqia e Erdogan po e blen gati badihava, me një spital parafabrikat njëkatësh në Fier dhe ca kuti vaksinash kineze.
Burime të Boldnews.al shprehen se vaksinat të prodhimit kinez, (ku asnjë vend i BE-së nuk i ka në përdorim), ishin siguruar para një muaji, por Rama i la enkas t’i tërhiqte ditën e hapjes së fushatës. Në këtë rast tregohet se nuk ka qenë qëllim aspak shëndeti i njerëzve, (sepse mund ti tërhiqte sapo i siguroi), por shpërblimi i Erdogan për fushatën e Ramës ka shumë arsye të tjera nga pas. Së pari Erdogan kërkon që nëpërmjet duarve të Ramës të shtrëngojë për fyti ata shtetas turq që njihen si Gylenistë dhe prej tij janë shpallur armiq, deri në epitetin terrorist.
Ramën po e konsideron si një Aga të vogël që për benefitet personale shkon dhe i falet “Sulltanit” duke nxjerrë në tregun e zi një komb. Gjithashtu vendin e ka larguar dhe po e largon gjithnjë nga Bashkimi Europian, duke shtuar kritikat ndaj saj dhe hedhur sytë drejt Turqisë dhe Kinës. Mjafton edhe një grusht vaksinash elektorale për të rrëzuar ëndrrën e kahershme shqiptare që u shfaqet prej tre dekadash siç është integrimi në BE.
Gjithashtu pas disa dhuratave si ndërtimi i disa shtëpive në Laç, ai i spitalit në Fier, apo vaksinave të serive fundore që nuk kanë garanci, fshihet ndikimi turk në vend. Objekte të shumta kulti po rikonstruktohen apo ndërtohen të reja nga donacione nga Turqia, shkolla të reja, kompani etj mbajnë markën “Made in Turkey”, duke gjetur terrenin në “shkretërën Shqipëri”, e cila prej tetë vitesh vegjeton nën haluçinacionet e kreut të qeverisë Rama.
Orientalizmi dhe madje hedhja sytë të Agait deri nga “Kina motër” përbën rrezikun e padukshëm sot, por që nesër mund të jetë tepër vonë për të dalë nga kthetrat e vendeve të cilët nëpërmjet joshjes kanë qëllimet e tyre gjestrategjike. Një Aga provincial në politikën e jashtme e kanë gjetur duke i siguruar një “harem” vaksinash kineze.
