Bylisi ka një sfidë shtëpie me Kastriotin në Ballsh, ndërsa duket se mallakastriotët do të synojnë fitoren e radhës, ndonëse janë me këmbë në tokë. Mesfushori Serxho Ujka është gati, ndërkohë që brazilianin, Aleksandre Garsia Kardozo është dëmtuar rëndë dhe nuk është më pjesë e Bylisit. “Panorama Sport” raporton se ai është larguar pranë familjes me mirëkuptimin e klubit, duke qenë se e ka mbyllur para kohe sezonin.
Kardozo ishte një titullar fiks në mesfushë duke qenë i preferuar nga Dovedan. Braziliani ishte një nga më të ndëshkuarit me kartonë të verdhë në ekip, por këtë herë e ndali dëmtimi. Për ndeshjen ndaj Kastriotit, ballshiotëve do t’u mungojë edhe sulmuesi kryesor, Bexhi Antoni. Ky i fundit ka plotësuar numrin e kartonëve të verdhë.
TË RINJTË – Pjesë e skuadrës se parë janë edhe dy lojtarë mjaft të talentuar nga U-21 të cilët në këtë pjesë të dytë te garës janë parë më shumë edhe me skuadrën e parë. Beratasi Flamur Ruçi që së fundmi është bërë edhe pjesë e kuqezinjve U-20 ndonëse sapo ka mbushur të 18-at. Ndërkohë që kanë spikatur sidomos me U-19 e Bylisit dhe U-21. Xhoel Maçolli, mesfushori 19-vjeçar nga Pogradeci, është edhe kapiten tek U-21 i Bylisit, por një futbollist që ka luajtur me skuadrën e parë edhe në Kupën e Shqipërisë, por ka qenë pjesë edhe në shumë ndeshje në kampionat.
