Nga Boldnews.al
Në Dhjetor 2019, ministrja e Mbrojtjes e asaj kohe, Olta Xhaçka, nëpërmjet një deklarate të shprehur në mënyrë ekzaltuese, deklaroi se i kishte dërguar një kërkesë NATO-s për ta shndërruar pikën ushtarake të Pashalimanit në Vlorë në bazë strategjike të Aleancës së Atlantikut.
Por, përtej kërkesës pompoze, baza e Pashalimanit nuk ka territor të mjaftueshëm për të mirëpritur një bazë të nivelit të NATO-s.
Në vitin 2016, më shumë se 80 përqind e territorit të bazës së Pashalimanit u shkëput prej saj, nëpërmjet procedurave të dyshimta administrative.
Nga një territor me një sipërfaqe prej 108 hektarësh deri në vitin 2015, aktualisht baza detare e Pashalimanit është tkurrur në një sipërfaqe prej 14 hektarësh.
Në vitin 2019, Olta Xhaçka nuk miratoi kërkesën e Forcës Detare për rikthimin e të gjithë territorit të bazës nën pronësinë e Ushtrisë Shqiptare.
Dhe, në një sipërfaqe të tillë minimale, është e paimagjinueshme që të ngrihet një bazë e Aleancës më të madhe ushtarake në botë.
Denoncimi me fakte vjen nga Artur Meçollari, një ish-drejtues i lartë i Forcës Detare deri në Gusht 2020, i cili ka detajuar skandalin në një letër drejtuar kryeministrit Edi Rama dhe ambasadores amerikane në Tiranë, Yuri Kim, në dhjetor 2020.
Ftesa për NATO-n
Olta Xhaçka shfrytëzoi ceremoninë e kthimit të dy anijeve nga një mision i NATOS-s në detin Egje në fund të vitit 2019, për të treguar qytetarëve shqiptarë se, falë qeverisë ku edhe ajo ishte pjesë, tashmë Ushtria Shqiptare dhe vetë shteti ynë, ishte i gatshëm të mirëpriste misione të rëndësishme ndërkombëtare.
Kërkesa e ministres Xhaçka u mirëprit edhe nga selia e NATO-s, e cila, nëpërmjet një zëdhënësi, deklaroi për median shqiptare se po e shqyrtonin kërkesën e paraqitur nga Tirana zyrtare.
Shumë muaj pas këtij shkëmbimi zyrtar letrash, nuk ka pasur asnjë sinjal për ndërtimin e një raporti të tillë mes Shqipërisë dhe NATO-s.
Nuk ka të dhëna për këtë “bllokim” komunikimi. Por, arsyeja mund të gjendet në një shpjegim që ka bërë ish-drejtuesi i lartë i Forcës Detare, Artur Meçollari, në letrën drejtuar kryeministrit Rama dhe ambasadores Kim, në cilësinë e përfaqësueses së vendit kryesor të NATO-s.
Skandali sipas Meçollarit
Baza detare e Pashalimanit në Vlorë, e cila është edhe një prej më kryesoreve në kuadrin operacional të Ushtrisë Shqiptare, kishte një sipërfaqe prej 108.7 hektarësh deri në vitin 2015.
Kjo bazë ka qenë përherë një prej pikave strategjike të Shqipërisë. Pashalimani është ngulitur në memorien e shqiptarëve edhe nëpërmjet filmit “Ballë për ballë”, një prej emblematikëve të “Kinostudios Shqipëria e Re”, pavarësisht glorifikimit të “forcës së komunizmit shqiptar”.
Qeveria shqiptare, me një vendim të Majit 2015, vendosi ndarjen e Forcës Detare nga Kantieri i Riparimit dhe Ndërtimit të Anijeve (KNRA).
Sipas Artur Meçollarit, nga kjo ndarje, territori i bazës së Pashalimanit u rrudh në 93.8 hektarë, pasi 14.9 hektarë i kaluan KNRA-së.
Por, kjo rrudhje nuk ishte e vetmja. “Në 26 janar 2016, në zbatim të urdhërit të Shefit të Shtabit të Përgjithshëm, një grup pune vendosi ndarjen në 4 pjesë të pronës nr. 937 (bazën e Pashalimanit).
Nga kjo ndarje, baza origjinale e Pashalimanit mbeti efektivisht me vetëm 14.34 hektarë. “Ndërsa pjesa tjetër, prej 79.46 hektarësh mbeti jashtë Planit të Vendosjes dhe Përhapjes (PVP)”, i cili ishte miratuar më herët nga Presidenti i Republikës, shkruan ish-drejtuesi i lartë i Forcës Detare, Meçollari.
Ai vijon më tej: “Në nëntor 2019 komanda e Forcës Detare propozoi futjen në Planin e Vendosjes dhe Përhapjes (PVP) të pronave të nxjerra jashtë në vitin 2016”.
Këto prona ende nuk janë përfshirë në PVP, siç konstaton Meçollari.
“Në nëntor të vitit 2019, Ministria e Mbrojtjes i kërkoi zyrtarisht NATOS-s që Baza Detare e Pashalimanit të kthehet në një bazë të Aleancës së Atlantikut. NATO ktheu përgjigje pozitive dhe së shpejti, besoj, strukturat e saj do të bëjnë një vlerësim. Por baza ka mbetur vetëm 14.34 ha”, thotë Artur Meçollari në letrën e tij drejtuar kryeministrit Rama dhe ambasadores Kim.
