Imazhi i aktorit Robert Ndrenika është përdorur sërish për qëllime propagandistike nga kryeministri Edi Rama.
Kreu i qeverisë ka postuar në faqen e tij zyrtare në FB, një video ku shfaqet Ndreka, i cili njësohet me “Rilindjen” teksa shprehet se “jemi vetëm në gjysmën e rrugëtimit tonë” dhe “akti ynë i dytë s’ka ardhur ende”.
“Akti i dytë është vizioni i një Shqipërie më të mirë me një ekonomi më të fortë. Me paga më të larta. Me turizëm që lulëzon. Më shumë mundësi për rininë. Përkujdesje për të pamundurit dhe për njerëzit në nevojë. Është koha që punët e nisura ti shpiem deri në fund”, reciton Ndrenika në videon e shpërndarë nga Rama në rrjetin social këtë të Enjte – dita kur Partia Socialiste nis zyrtarisht fushatën elektorale për zgjedhjet e 25 Prillit.
“Të ardhmen që meritojmë kemi filluar ta prekim, së bashku do vallëzojmë sërish, do këndojmë sërish, do ringrihemi përsëri më të fortë se më parë. Nuk ka kohë për pushim, Shqipëria është e ardhmja jonë”, shprehet më tej aktori, me videon që mbyllet me apelin vizual për të votuar Partinë Socialiste në zgjedhjet e 25 Prillit.
Edhe më herët, imazhi i Robert Ndrenikës është përdorur nga Rama për të propaganduar ‘përfitimet’ e shembjes së Teatrit Kombëtar. Pozicionimi i aktorit krah Ramës dhe si mbështetës i kauzës së shembjes së teatrit ka marrë kritika të shumta nga qytetarë përmes reagimeve në rrjetet sociale, apo dhe zëra të spikatur të shoqërisë civile.
