Detaje të reja mësohen nga aksidenti me pasojë vdekjen e një personi, ndodhur mëngjesin e sotëm në Qerret të Kavajës. Viktima është Luan Veliu, 65 vjeç, banues në Kavajë.
Aksidenti ndodhi rreth orës 06:30 në rrugën dytësorë Kavajë-Mali i Robit, përballë shollës në Qerret. Mjeti tip “Audi” me targë “AA012 GP” i drejtuar nga Sulejman Xhama, 40 vjeç, ka përplasur Veliun.
Ky i fundit, sipas një rindërtimi paraprak të ngjarjes nga autoritetet, ishte duke lëvizur në këmbë në të njëjtin drejtim me automjetin, ndërsa në momentin e përplasjes po tentonte të kthehej majtas për në degëzimin e rrugës që të çon në fshatin Qerret.
Përplasja rezultoi fatale për 65-vjeçarin, i cili humbi jetën.
Zyrtarisht, policia njoftoi se drejtuesi i mjetit u shoqërua në Komisariatin e Policisë Kavajë për veprime të metejshme hetimore, ndërsa shtoi se vijon puna nga grupi hetimor për sqarimin e rrethanave të ngjarjes.
