Tre perona janë arrestuar në Elbasan, si pjesë e një grupi që akuzohet se shpërndante drogra të forta në qytet, kryesisht kokainë. Gëzim Mama, 34 vjeç, Hekuran Halili, 44 vjeç dhe Simon Stefa 54 vjeç të tre banues në Elbasan, u arrestuan.
Operacioni i koduar “Bulevardi” u finalizua pas 5 muajsh hetime nga policia dhe prokuroria dhe çoi në sekuestrimin e një sasie kokaine, 2 armë zjarri dhe 4 aparate celularë. Efektivët e Hetimit të narkotikëve dhe Trafiqeve të Paligjshme në DVP Elbasan, FNSH dhe Forcat e Posaçme “Shqiponja” finalizuan aksionin.
Gjatë kontrollit në banesën e Stefas u gjetën dhe sekuestruan dy armë zjarri pistoletë, një sasi fishkësh dhe një sasi lënde narkotike kokainë e ndarë në doza.
“Nga hetimet e kryera është dokumentuar me prova ligjore veprimtaria kriminale e këtyre shtetasve, të cilët merreshin me shpërndarjen e kokainës në qytetin e Elbasanit”, njoftoi policia.
Ndaj 3 të arrestuarve është ngritur akuza për veprën penale “Prodhimi dhe shitja e narkotikeve”, kryer në bashkëpunim dhe në ngarkim të Stefas edhe akuza për veprën penale “Armëmbajtja pa leje”.
