Ditën e nesërme, luhet sfida Shqipëri-Andorra, e vlefshme për Kualifikueset e Botërorit Katar 2022. Shqipëria bën pjesë në grupin I dhe ka si kundërshtar Andorrën, Hungarinë, Anglinë, Poloninë dhe San Marinon.
Në prag të kësaj sfide, Edi Reja, dje ka punuar me 28 futbollistë. Të gjithë kuqezinjtë kanë qenë të gjithë në dispozicion të trajnerit, ku është punuar në fushë për një formacion të mundshëm ndaj Andorrës.
Provat kanë qenë të shumta, duke qenë se edhe koha është e pamjaftueshme për të përgatitur siç duhet gjithçka. “Panorama Sport”, ka mësuar disa nga provat që ka hedhur në fushë italiani gjatë stërvitjes së djeshme.
Për sulmin, duket se Reja ka testuar skemën me 3 bomberët Cikalleshi dhe Manaj e Uzuni. Ky i fundit duket se “zbut” trajnerin dhe imponohet me formën. Nën rreshtimin 3-4-3, prova ka vijuar me dyshen Bare-Gjasula në qendër të mesfushës dhe në fashat anësore janë provuar fillimisht Hysaj dhe Lenjani. Në prapavijë, treshja që blindon repartin përbëhet nga Gjimshiti, Ismajli dhe Kumbulla. Porta, në skuadrën e “titullarëve”, ka qenë Strakosha, mirëpo shpesh është theksuar se cilido prej gardianëve që të luajë, Shqipëria është e sigurt.
Ajo që e vështirëson këtë herë gjetjen e formacionit, është fakti se trajneri ka detyrimin për fitore ndaj Andorrës, por ka lojtarë që vijnë me pak minuta dhe nga dëmtimet si në rastin e Gjasulës dhe Memushajt.
Kësisoj, nuk përjashtohet që Shqipëria në Andorrë të jetë edhe me variantin tradicional së fundmi, 3-5-2, ku Memushaj merr një vend në treshen e mesfushës. Për këtë, balotazhi kalon mes Uzunit dhe Lenjanit, se cili luan në fashën e majtë.
Formacionet e mundshme:
Varianti 1: 3-4-3 Strakosha; Ismajli, Gjimshiti, Kumbulla, Hysaj, Bare, Gjasula, Lenjani, Manaj, Cikalleshi, Uzuni
Varianti 2: 3-5-2 Berisha; Ismajli, Gjimshiti, Kumbulla, Bare, Gjasula, Memushaj, Uzuni, Manaj, Cikalleshi
