Një vrasje mes shokësh në Tiranë është mbyllur sot me dënimin e njërit prej tyre me 10 vjet e 6 muaj burgim pasi i mori jetën tjetrit në një krim që ndodhi rreth 15 muaj më parë në kryeqytet.
Noel Dishi i cili mban dhe emrat Noel Kola Veri e Milklovan Prifti, është 29 vjeçari që u dënua sot nga Gjykata e Tiranës.
I riu u akuzua se më 20 janar 2020 vrau me armë një shokun e tij 28 vjeçar, Vilson Tafçiu, në zonën e Astirit në kryeqytet.
I pandehuri u përball me akuzat për “vrasje me dashje” dhe “armëmbajtje pa leje”. Gjykata shpalli 16 vjet burg për këto dy akuza dhe pas gjykimit të shkurtuar vendosi për 10 vjet e 6 muaj.
Në hetimin që shqyrtoi gjykata, ishte dhe dëshmia e vajzës B.L., e cila ka pasur njohje me të akuzuarin dhe viktimën.
Në deklarimet e saj, dëshmitarja ka deklaruar se i kishte njohur dy personat në rrethana të pavarura dhe se i akuzuari Noel kishte këmbëngulur për t’u lidhur me të. Ajo ka vënë re një acarim të të akuzuarit, kur ai kishte mësuar se ajo kishte njohje edhe me Vilsonin.
Dëshmitarë të tjerë thanë se 29 vjeçari kishte pasur hatërmbetje me Vilsonin pasi sipas tij e kishte sharë tek një vajzë.
Gjykata çmoi se Noeli vrau Vilsonin në gjaknxehtësi e sipër, pas një grindjeje të çastit, për shoqërinë pretenduar nga secili prej tyre për të njëjtën vajzë.
Dy të rinjtë janë takuar normalisht me njëri-tjetrin në një lokal dhe kanë folur. Më tej kanë dalë jashtë lokalit, ku edhe kanë debatuar dhe Noeli ka qëlluar drejt Vilsonit.
I pandehuri tha në sallën e gjyqit se e pranonte krimin duke theksuar se ishte fyer dhe kërcënuar nga Vilsoni, duke thënë se viktima e kishte fyer edhe në bisedat me shoqen e tij. Noeli tha se ishte penduar për krimin e kryer.
