Kryeministri Edi Rama ka sulmuar këtë të Martë komisionerët e Bashkimit Europian. Sipas Ramës, ata po ndërhyjnë në fushatën e brendshme elektorale në vendin tonë. Në akuzat e tij, Rama u referohet videokonferencave që komisionerë të ndryshëm kanë zhvilluar me kryetarin e Partisë Demokratike Lulzim Basha.
“Në dijeninë time Komisioni Europian nuk e ka zakon të fusë hundët në fushatat elektorale dhe unë pres ta mësoj zyrtarisht e publikisht nga Brukseli, nëse e kam unë gabim e ndoshta komisionerët kanë vërtetë të drejtë të bëhen palë kur popujt e Europës zgjedhin qeveritë e tyre! Dikush në Bruksel duhet t’u thotë komisionerëve që harxhojnë kohën e punës së paguar nga taksat e popujve të Europës, për të bërë videomuhabete elektorale me Lulëzim Bashën, se kjo quhet ndërhyrje në fushatën e brendshme elektorale të një vendi kandidat për në BE”, shkruan Rama në Twitter.
Këtë të Martë, Basha zhvilloi një videokonferencë me komisioneren e BE për Inovacionin, Arsimin dhe Rininë, Mariya Gabriela. Javën e kaluar po ashtu, zhvilloi një videokonferencë me Komisionerin e BE Johannes Hahn.
