Ministria e jashtme e Kinës tha të martën se kishte thirrur ambasadorin e Bashkimit Evropian, Nicolas Chapuis, për t’i paraqitur një “protestë të ashpër” kundër sanksioneve që blloku vendosi ndaj zyrtarëve kinezë për shkeljen e të drejtave të njeriut në provincën veriperëndimore të Sinkiangut.
Shtetet e Bashkuara, Bashkimi Evropian, Britania dhe Kanadaja i vendosën sanksionet të hënën, hapi i parë i koordinuar perëndimor i këtij lloji kundër Pekinit nën presidentin e ri të SHBA Joe Biden.
Pekini u kundërpërgjigj menjëherë me masa ndëshkuese kundër BE-së që, me sa duket, ishin më të gjera dhe përfshinin ligjvënës evropianë, diplomatë, institute dhe familje si dhe duke i ndaluar bizneset e tyre të bëjnë tregti me Kinën.
Qeveritë perëndimore po përpiqen ta mbajnë Pekinin përgjegjës për ndalimet masive të ujgurëve myslimanë në Kinën veriperëndimore, ku Shtetet e Bashkuara thonë se Kina po kryen gjenocid. Kina i ka mohuar akuzat.
