Mbrëmjen e sotme Ligue 1 rezervon një super përballje, e cila mund të jetë vendimtare edhe për luftën për titullin kampion. Në orën 21:00 pritet të zhvillohet sfida mes Lyon dhe PSG-së, ku të dyja ekipet janë me pikë të barabarta.
Sigurisht që tifozët vendas nuk mund të qëndronin pasiv dhe kanë vendosur ta ndezin ende pa filluar ndeshjen. Në një nga sheshet e qytetit grupimi i ultrasve “Bad Gones” ka vendosur një banderolë gjigante, ku ka disa “thumbime” të drejtëpërdrejta për organizatorët e Kupës së Botës 2022.
“Ryshfet, para të pista, skllavëri modern… Mirësevini në Katar”, shkruhet në banderolë. Mesazhi shkon për vendin e Lindjes së Mesme, ku kanë vdekur më shumë se 600 punëtorë gjatë ndërtimit të impianteve ku do të zhvillohen ndeshjet. Ende nuk ka një reagim për këtë veprim të ultrasve, por një gjë është e sigurtë që përballja do të jetë padyshim emocionuese.
