Deri më tani te skuadra e Partizanit, janë dy futbollistë që kanë marrë ftesa nga kombëtaret e tyre: Ferhan Hasani dhe Roberto Dominguez.
Por, paradoksi është se asnjë nga këta futbollistë, nuk ka luajtur për Partizanin këtë sezon. Të dy lojtarët janë afruar në merkaton e janarit me Ferhan Hasanin që ka luajtur me pikatore, e me Dominguez që ende nuk e ka veshur fanellën e Partizanit.
Ferhan Hasani rikthehet përsëri në radhët e përfaqësueses së Maqedonisë së Veriut, edhe pse mesfushori nuk ka luajtur ende një rol të rëndësishëm në radhët e Partizanit, që kur iu bashkua të kuqve në merkaton e janarit.
Hasani ishte pjesë e përfaqësueses së Maqedonisë së Veriut për herë të fundit tetorin e kaluar dhe kjo është mundësia e tij për të treguar se e meriton një ftesë në Europianin e kësaj vere. Përballë Gjermanisë me datën 31 mars, Hasani pritet do të luajë rol të rëndësishëm.
Roberto Dominguez, qendërmbrojtësi nga El Salvadori, erdhi nga ekipi i Bolivar, teksa nuk ka arritur akoma të debutojë me “demat e kuq” të Ilir Dajës. Pavarësisht faktit që nuk po merr minuta, 23-vjeçari ka marrë një ftesë nga kombëtarja e tij për ndeshjet kundër Grenada dhe Montserrat./Panoramasport
