Kombëtarja shqiptare rikthehet në fushën e lojës gjatë këtij muaji, teksa në program janë dy sfida të vlefshme për kualifikueset e Kupës së Botës Katar 2022, ndaj Anglisë dhe San Marinos më datë 28 dhe 31 mars. Ndërkohë më datë 25 mars, skuadra e drejtuar nga Reja do të zhvillojë një ndeshje miqësore ndaj Andorrës.
E nga sa pritet që listazyrtare e futbollistëve të ftuar të publikohet ditën e nesërme zyrtarisht nga FSHF-ja, Reja ka bërë jo pak ndryshime. “Panorama Sport” mëson se një ditë para publikimit të listës zyrtare për tri ndeshjet e radhës, Edi Reja ka lënë jashtë lojtarë të rëndësishëm të boshtit të kuqezinjve.
Emra të rëndësishëm me kontribut të konsiderueshëm në Kombëtare, si Armando Sadiku dhe Odise Roshi, janë ende pa një ftesë. Jo vetëm kaq, por pjesë e ndryshimeve është edhe porta, pasi Alban Hoxha, portieri i Partizanit, pritet të mbesë pa ftesë kësaj here në Kombëtare, njësoj si sulmuesi i Tiranës, Taulant Seferi. Për Shqipërinë, Odise Roshi ka qenë futbollist i rëndësishëm dhe në edicionin e Ligës së Kombeve ishte një nga më rezultativët me golat dhe asistet e tij.
Mesfushori fierak është pjesë e Diosgiorit në Hungari dhe i rikthyer në gatishmëri të skuadrës pas një dëmtimi. Goli historik i Armando Sadikut është i paharrueshëm për të gjithë shqiptarët, e po ashtu golat dhe kontributi me Shqipërinë.
Megjithatë, transferimi në Amerikën Latine te skuadra e Bolivarit, duket se ka ndikuar në zgjedhjen e trajnerit Reja, nisur edhe nga forma e mirë e sulmuesve Broja, Manaj, Cikalleshi dhe Uzuni që vijnë të gjithë me gola në këmbë dhe formë mjaft të mirë. Së fundmi, një tjetër ndryshim pritet të jetë lënia jashtë e Alban Hoxhës, portierit të Partizanit.
