Sot u zhvillua ndeshja mes Laçit dhe Partizanit e vlefshme për çerekfinalen e Kupës së Shqipërisë. Bardhezinjtë e drejtuar nga trajneri Shpëtim Duro ia dolën të kualifikoheshin falë fitores 4-3 nga pika e bardhë e penalltive.
Ky takim ka pasur disa raste të diskutueshme ku vlen të veçohen dy momente në zonën laçiane. Në minutën e 31-të, Erald Çinari asistohet bukur nga shokët e skuadrës, por një shtyrë nga qendërmbrojtësi Ignjatoviç e hedh atë në tokë. Për gjyqtarin Kridens Meta gjithçka është e rregullt dhe loja duhet vazhduar. Protestat ishin prezente, por verdikti i kryesorit mbeti i njëjtë.
Është sërish protagonist sulmuesi i Partizanit, Erald Çinari, i cili pengohet prapë në zonën e laçianëve. Julian Shehu i prish goditjen shkodranit duke i ndërhyrë nga pas me takë në thembër. Pamjet filmike tregojnë gjithçka, por edhe këtë radhë për Kridens Metën loja duhej vazhduar.
Kujtojmë që pas ndeshjes, trajneri i të kuqve Ilir Daja kritikoi ashpër arbitrin e kolegjiumit të Tiranës, megjithatë tashmë fakt mbetet se Laçi është ekipi që u kualifikua në gjysmëfinalen e Kupës së Shqipërisë.
