Këngëtarja me origjinë shqiptare, Dua Lipa, natën e ndarjes së çmimeve Grammy e përfundoi me një fitore të madhe, pasi albumi i saj i dytë “Future Nostalgia” mori çmimin për albumin më të mirë vokal të muzikës së zhanrit pop. Pas performancës së saj elektrizuese të “Levitating (Remix)” së bashku me DaBaby, Lipa mori çmimin Grammy, ku në garë për albumin më të mirë vokal pop ishin edhe Justin Bieber, Lady Gaga dhe Taylor Swift.
Vjosa Osmani ka uruar këngëtaren Dua Lipa për marrjen e çmimit Grammy për albumin më të mirë vokal pop.
“Ju nuk jeni vetëm një frymëzim për vajzat dhe gratë në Kosovë, por edhe në të gjithë botën. Ju na bëni gjithnjë e më krenarë çdo ditë. Vazhdoni të shkëlqeni”, ka shkruar Osmani në Twitter.
Albin Kurti ka uruar këngëtaren për marrjen e çmimit Grammy për albumin më të mirë vokal të zhanrit pop. Kurti në një postim në Twitter ka thënë se Lipa është frymëzim për të rinjtë tanë.
“E përgëzoj Dua Lipën për fitimin e Grammy për BestPopVocalAlbum. Me punën e saj, talentin e saj dhe shpirtin e saj ajo ka mahnitur botën dhe është levituar kombi i saj. Ajo është një frymëzim për të rinjtë tanë dhe një ambasadore për vendin tonë”, ka shkruar Kurti.
Urimi i radhës ishte nga kryetari i Aleancës për Ardhmërinë e Kosovës (AAK), Ramush Haradinaj.
“Vazhdon të na bëjë krenarë. Edhe një “Grammy” për zërin që dëgjohet me ëndje në të gjitha kontinentet. Faleminderit Dua!”, shkruan Haradinaj në Facebook.
