Policia e Korçës ka arrestuar dy persona pasi u kapën duke transportuar 26 emigrantë të paligjshëm, me një mjet të cilin e drejtonin pa leje drejtimi dhe ka shpallur në kërkim një tjetër i dyshuar si bashkëpunëtor.
Sipas njoftimit të policisë, u bë kapja dhe arrestimi në flagrancë i shtetasve P. M., 17 vjeç, banues në fshatin Vloçisht, Maliq; K. R., 24 vjeç, banues në Korç, , si edhe u shpall në kërkim shtetasi R. Ç., 24 vjeç, banues në Maliq.
“Shërbimet e Policisë, kanë kapur në vendin e quajtur “Ura e Drithasit”, në Maliq, mjetin furgon tip “Volkswagen”, me drejtues shtetasin P. M., i cili kundrejt shpërblimit po transportonte në drejtim të Tiranës, 26 emigrantë të paligjshëm. Nga kontrolli i dokumentacionit të 17-vjeçarit, rezultoi se ai drejtonte mjetin pa leje drejtimi. Në vijim të veprimeve hetimore të kryera, dyshohet që shtetasit K. R.,(i arrestuar) dhe R. Ç., (i shpallur në kërkim) ishin bashkëpunëtorët e shtetasit P. M., në këtë veprimtari të paligjshme”, bënë me dije burime zyrtare.
Materialet në ngarkim të tyre i kaluan Prokurorisë Korçë për veprat penale “Drejtimi i automjetit në mënyrë të parregullt” dhe “Ndihma për kalim të paligjshëm të kufijve”, kryer në bashkëpunim, shtuan të njëjtat burime.
