Rikthimi i Eraldo Çinarit te skuadra e Partizanit pas shlyerjes së dënimit ka qenë “blerja” më e suksesshme e të kuqve këtë sezon.
Çinari u rikthye për të kuqtë pikërisht në sfidën derbi të shkuar, ku u aktivizua nga stoli. Pak minuta i mjaftuan për të qenë protagonisti absolut, pasi në minutën e 83-të, i dha fitoren 1-0 Partizanit me golin e tij.
24-vjeçari ka luajtur vetëm 9 ndeshje këtë sezon në Superiore, por kaq i kanë mjaftuar që të jetë një ndër golashënuesit më të mirë të Partizanit. 636 minuta ka luajtur shkodrani, duke realizuar 4 gola dhe duke asistuar një herë për shokët e skuadrës. Mesatarja e Çinarit, është një gol në çdo 159 minuta, që është një ndër më të mirat në Superiore. Sa i takon ndeshjeve derbi, Çinari ka luajtur 8 herë me fanellën e Partizanit, duke realizuar 3 gola. Rrjetat e sulmuesit kanë qenë vendimtare.
Dy gola i ka shënuar në sfidën e fundit derbi të sezonit 2018- ’19, ku i dha jo vetëm fitoren 2-1 Partizanit, por dhe matematikisht titullin kampion. Ndërsa golin e tretë, e shënoi në takimin më të fundit të luajtur në 21 janar të këtij viti, duke i dhënë fitoren 1-0 “demave të kuq” në Elbasan.
Çinari mund të quhet një pa diskutim një “armik” i Tiranës, jo vetëm për golat që i ka shënuar me fanellën e Partizanit. Shkodrani u ka shënuar bardhebluve edhe me fanellën e Vllaznisë, në sezonin 2014-’15, një sfidë që u luajt në stadiumin “Qemal Stafa”. Asokohe vetëm 18 vjeç, Çinari kalonte në avantazh Vllazninë përballë bardhebluve në minutën e 33-të, duke nisur kështu një ecuri shumë të mirë përballë kryeqytetasve, që tashmë po vazhdon dhe me fanellën e Partizanit./Panoramasport
