Atentati ku mbeti i vrarë Tauland Gjikaj në Vlorë javën e kaluar dyshohet se ka ndodhur për shkak të një konflikti për rreth 35 mijë euro.
Viktima që njihej edhe me mbiemrin Beqiri e Manaj, dyshohet se kishte detyrim ndaj palës tjetër lidhur me shitjen e një automjeti tip Benz-Mercedez, për të cilin refuzonte të dorëzonte pagesën.
I arrestuari për vrasjen në rrugën trans-ballkanike, Hansi Jonuzaj, gjatë marrjes në pyetje ka pretenduar se në debat e sipër, Taulant Manaj së bashku me shokët e tij, ka shkuar në lokal në “Lungomare” dhe ka kërcënuar tre personat, duke i thënë se “do ju mbush kokën me plumba”.
Policia ka shpallur në kërkim shtetasit Elton Hajnaj dhe Skedjan Grabani nga njëri prej grupeve të përfshira në vrasjen e Manajt, ndërsa për grupin tjetër që ka qëlluar në drejtim të makinës ku udhëtonin Hansi Jonuzaj, Hajnaj dhe Grabani, rezulton të jetë shpallur në kërkim dy persona të tjerë me inicialet S.Z dhe K.D.
Nga verifikimi i kamerave që kanë kryer oficerët e policisë, dyshohet se shtetasi S.Z, mik i Taulant Manaj, ka qëlluar tri herë me pistoletë në drejtim të mjetit “Ford Fiesta”.
Të shtënat me armë janë kryer nga një automjet tip “Renault Laguna”, ngjyrë e bardhë me portobagazh, në të cilën shofer ishte një shok tjetër i viktimës Taulant Manaj.
Të tre plumbat e qitura nga një pistoletë kanë përshkuar makinën, ku ndodheshin Hansi Jonuzaj në timon, Elton Hajnaj dhe Skedjan Grabani në sediljet e pasagjerit.
Sipas dinamikës së ndërtuar nga policia, pas tre të shtënave me armë mbi “Ford-Fiesta”, nga ky automjet kanë dalë Elton Hajnaj dhe Skedjan Grabani, dhe të dy janë drejtuar tek Taulant Manaj që ndodhej në trotuarin e rrugës “Transballkanike”.
Në këtë moment njëri prej tyre, ka qëlluar 5 herë ndërkohë që 3 plumba kanë prekur të riun Taulant Manaj duke i marrë jetën.
