“Për fat të keq, sot kemi viktimën më të vogël në vendin tonë. Një fëmijë që kaloi 17 nga 37 ditët e tij i infektuar me koronavirus”, – ka shkruar në llogarinë e tij Kryeministri grek, Kyriakos Mitsotakis.
Mediat vendëse raportuan se e hëna ishte një ditë tronditëse për të gjithë publikun pas lajmit që qarkulloi shpejt. Mes 6800 viktimave që janë publikuar në të gjithë vendin, është edhe një foshnjë 37-ditëshe.
Ministria e Shëndetësisë, në një deklaratë zyrtare, tha se djali i vogël u soll në spitalin pediatrik të Athinës në mes të shkurtit me inflamacione në hundë dhe me ethe. Që nga ai moment, u vendos nën kujdesin intensiv të mjekëve, por e ka pasur të pamundur të jetojë.
Mësohet se fëmija nuk ka pasur komplikacione të tjera, ndaj arsyeja e fundit tragjik është Covid-19. Nuk raportohet nëse nëna ishte mbartëse e virusit në kohën që solli në jetë vogëlushin e saj.
6.800 njerëz kanë vdekur nga virusi në Greqi, ndërsa gati 480 të tjerë vazhdojnë të jenë nën kujdes intensiv.
Ministria e Shëndetësisë, javën e kaluar tha se po kërkonte spitale të tjera, pasi me këto flukse sistemi shëndetësor publik në Athinë është nën “presion të padurueshëm”.
Qeveria e Mitsotakis është akuzuar nga opozita për dështimin në menaxhimin dhe përhapjen e pandemisë, pavarësisht se vendi është pothuaj i izoluar që nga muaji nëntor.
