Qendrat për Kontrollin dhe Parandalimin e Sëmundjeve (CDC) në SHBA njoftoi se amerikanët e vaksinuar plotësisht kundër koronavirusit, mund t’i kthehen normalitetit, sipas The Guardian.
Sipas guidës të publikuar të Hënën:
Amerikanët që janë vaksinuar plotësisht mund të takohen me njëri-tjetrin në ambjentet e brendshme pa maska. Ata mund të mblidhen në mënyrë të sigurt në shtëpi me njerëz të pavaksinuar, pjestar të së njëjtës familje ose persona me rrezikshmëri të ulët pa mbajtur maska.
Ky ështënjë lehtësim i madh për amerikanët e moshuar, shumë prej të cilëve janë vaksinuar, por kanë ende muaj pa vizituar fëmijë, nipër e mbesa ose të afërm të tjerë për shkak të pandemisë.
Njerëzit konsiderohen të mbrojtur dy javë pasi të marrin dozën përfundimtare të vaksinës së tyre, tha Qendrat për Kontrollin dhe Parandalimin e Sëmundjeve.
Zyrtarët shëndetësorë i paraqitën udhëzimet e reja gjatë një konference të task-forcës së Shtëpisë së Bardhë për koronavirusin.
Disa prej udhëzimeve thonë:
Mund të takoheni në ambiente të mbyllura me persona të tjerë plotësisht të vaksinuar, pa maska ose distancë fizike.
Mund të takoheni në ambiente të mbyllura me njerëz të pavaksinuar të së njëjtës familje, nëse ata janë në rrezik të ulët për sëmundje të rëndë nga koronavirusi.
Shmangni testimin ose karantinën kur ekspozoheni ndaj koronavirusit, përveç nëse ju shfaqen simptoma.
Sipas udhëzimeve të reja, ata që janë vaksinuar iu kërkohet ende t’i ndjekin masat bazike të sigurisë, si: veshja e maskave dhe distanca fizike në publik, si dhe shmangia e turmave të mëdha.
Deri më tani, mbi 30 milionë amerikanë janë vaksinuar plotësisht. Dhe mbi 90 milionë amerikanë kanë marrë dozen e parë.
Tri vaksinat e miratuara janë: Pfizer/BioNTech, Moderna dhe Johnson & Johnson.
Dy të parat duhet të jepen me nga dy doza, ndërsa e fundit vetëm me një dozë.
