Milani është rikthyer në qendrën e vëmendjes së investitorëve të mëdhenj dhe kërkesa e fundit zyrtare vjen nga një biznesmen moldav. Personi në fjalë quhet Aleksandër Juçov, themeluesi dhe shefi ekzekutiv i “World Lab Technologies Corporation”, i cili ka dalë hapur mediatikisht me një komunikatë zyrtare, në të cilën shpreh interesimin serioz dhe bindjen e tij për blerjen e 100 përqind të kuotave të klubit kuqezi.
Biznesmeni 52-vjeçar ndoshta ka hyrë disi me vonesë në vëmendjen e medias italiane dhe asaj botërore, pasi e vërteta është që Juçov duket se këtë dëshirë e ka shprehur hapur dhe e ka postuar në të gjitha uebsajtet e kompanive që ai ka themeluar që në 18 gusht 2020.
Por, me sa duket, zyrtarizimi i këtij interesi është bërë i ditur publikisht që kur stafi ligjor i miliarderit të lindur në Çisinau ka depozituar një kërkesë në studion ligjore “Raimondi-Frate-Marriots”, e cila do të menaxhojë në Itali aktivitetet e konsulencës dhe asistencës, lidhur me bisedimet për blerjen e mundshme të klubit të Milanit. Fondi amerikan “Elliott” nuk është ekspozuar pas këtij lajmi dhe nuk ka marrë asnjë qëndrim zyrtar mbi kërkesën dhe ofertën e bërë nga Aleksandër Juçov, por nga burime pranë “Elliott” ka skepticizëm dhe ftohtësi lidhur me këtë lajm. Kjo, ndoshta për faktin se vetë fondi amerikan që ka marrë menaxhimin e Milanit nuk kërkon që të dalë shumë shpejt nga skena e futbollit, madje vetë drejtuesit vazhdojnë punën për të arritur të gjejnë një akord me Bashkinë e Milanos që të ndërtojnë një stadium të ri dhe modern, pronësinë e të cilit do ta ndajnë së bashku me Interin.
KUSH ËSHTË ALEKSANDËR JUÇOV
I lindur në Çisinau (Moldavi) 52 vite më parë, Aleksandër Juçov është i impenjuar në fushën e kërkimit dhe zhvillimit të teknologjive të reja të energjetikës, logjistikës dhe projekteve infrastrukturore me impakt në zhvillimin social e rajonal. Kërkimi i teknologjive të reja është një objektiv primar i kompanisë “World Lab Technologies Corporation”, e cila po subvencionon dhe po investon në kërkimin dhe zhvillimin global në universitete të ndryshme të Shteteve të Bashkuara të Amerikës, Europës dhe Azisë. Në të njëjtën kohë, Aleksandër Juçov është shumë i kujdesshëm edhe ndaj investimeve në fushat e marketingut dhe rrjeteve sociale, ku nëse kompania e tij “World Lab Technologies Corporation” qarkullon nga 100-150 miliardë euro, biznesmeni moldav duket se ka qenë ai që vitin e kaluar ka bërë një ofertë prej 50 miliardë dollarësh për blerjen e trafikut të rrjetit “TikTok” në Shtetet e Bashkuara të Amerikës.
Ndërkohë, për Aleksandër Juçovin flitet se pasuria personale në kontot bankare është diçka më shumë se 5 miliardë euro, ndërsa qarkullimi i parave që kompanitë e tij lëvizin në botë janë disa qindra dhe po e ritheksojmë, disa qindra miliardë çdo vit. Shkurt, nëse vjen oferta e duhur për të bindur fondin “Elliott”, Aleksandër Juçov mund të jetë llamba e artë e Aladinit për klubin kuqezi dhe tifozët, për të sjellë investime kolosale, mes të cilave sigurisht mund të ishte edhe një stadium jo më në bashkëpronësi me Interin, por totalisht dhe vetëm i Milanit.
