Katër persona në Durrës kanë rënë në prangat e policisë për vepra të ndryshme penale.
Sipas policisë 25-vjeçari R.V dhe 18-vjeçari R.H në bashkëpunim me njëri-tjetrin shpërndanin lëndë narkotike.
Gjithashtu nga uniformat blu u arrestua O.H 29-vjeç banues në Borizanë pasi kishte shkelur masën e sigurisë vendosur nga gjykata “Arrest në shtëpi”.
Ndërsa 32-vjeçari D.G banues në Kamzë u arrestua pasi u konstatua nga policia se drejtonte mjetin në gjëndje të dehur.
Informacion– Vijon puna për parandalimin dhe goditjen e paligjshmërisë.
Bien në prangat e Policisë 4 shtetas, për vepra të ndryshme penale.
Specialistët për Hetimin e Narkotikëve, në bashkëpunim me Forcën Operacionale në DVP Durrës, në vijim të punës për goditjen e veprimtarisë kriminale në fushën e shpërndarjes së lëndëve narkotike, ndaluan shtetasit R. V., 25 vjeç dhe R. H., 18 vjeç, banues në Xhafzotaj, Shijak.
Ndalimi i këtyre shtetasve u bë sepse pas një pune të mirëfilltë hetimore ka rezultuar se në bashkëpunim me njëri-tjetrin ushtronin aktivitet kriminal duke shitur lëndë narkotike në doza të vogla, me qëllim përfitimin e vlerave monetare. Në cilësinë e provës materiale u sekuestruan një sasi lënde narkotike marijuanë, një sasi lënde narkotike kokainë dhe 2 aparate celular.
Specialistët për Hetimin e Krimeve në Komisariatin e Policisë Krujë arrestuan në flagrancë, për veprën penale “Largimi i të burgosurit nga vendi i qëndrimit”, shtetasin O. H., 29 vjeç, banues në Borizanë, pasi u konstatua nga shërbimet e Policisë, në Borizanë, duke shkelur masën e sigurisë “Arrest në shtëpi” të vendosur nga Gjykata e Shkallës së Parë Krujë, për veprat penale “Armëmbajtja pa leje” dhe “Kanosja”.
Specialistët e Qarkullimit Rrugor në Drejtorinë Vendore të Policisë Durrës arrestuan në flagrancë shtetasin D. G., 32 vjeç, banues në Kamzë, pasi u konstatua nga shërbimet e Policisë, në aksin rrugor Thumanë-Fushë Krujë, duke drejtuar mjetin në gjendje të dehur.
Materialet i kaluan Prokurorisë së Rrethit Gjyqësor Durrës dhe Prokurorisë së Rrethit Gjyqësor Krujë, për veprime të mëtejshme.
