7 marsi është një datë e shënuar për Guerrils, grupimin ultras që mbështet Partizanin prej 11 vitesh. Rrugëtimi i tyre ka nisur në një periudhë të vështirë të klubit, në kategoritë e ulëta, për të përjetuar më pas edhe fitimin e titullit kampion që vononte prej 26 vitesh.
Ata vijojnë të jenë krah ekipit të tyre edhe në këtë periudhë të vështirë pandemie dhe sot festojnë e përkujtojnë çka kanë kaluar ndër vite pas “demave të kuq”, duke shpalosur të famshmen ndërkombëtare të përshtatur në shqip: “Ju kurrë nuk do të jeni vetëm”.
“Ish’ një ditë kur besën dhamë… Prej asaj dite, pa kushte, pa justifikime, pa ndalesa. Kudo dhe kurdo, në çdo pengesë, në çdo vështirësi, në çdo kategori, përtej gjithçkaje dhe kundër gjithkujt, me vetëm një qëllim, mbrojtjen dhe lartësimin e emrit të Partizanit ! -shkruan abcnews.al.
U bënë 11 vjet që emri Ultras Guerrils 08-09 mbush tribunat plot pasion dhe mentalitet, plot dashuri dhe organizim, plot sakrificë dhe krenari … e gjithë pjesa tjetër është histori”, shkruajnë Guerrils në rrjetet sociale, dedikuar përvjetorit të 11-të. /abcnews.al
