Toni Selimi, një shqiptar nga Gostivari i Maqedonisë së Veriut, ka treguar së fundmi historinë e tij të jetës që nga fëmijëria kur u abuza e deri tek dashuria me kardiologun.
Selimi është ekspert i sjelljes, inteligjencës emocionale dhe psikologjisë së suksesit të biznesit, por në moshën pesë vjeçare është abuzuar seksualisht. Në një lidhje me Skype në emisionin ‘Rudina’, tha se e ka përjetuar shumë keq këtë eksperiencë.
“Në moshën pesë deri gjashtëvjeçare. Personi ka qenë, personi që prindërit e mi i kanë besuar më së tepërmi. Personi që ka punuar tek restorantet e prindërve të mi. Unë e kam shkruar se si vjen shkalla e abuzivitetit dhe manipulimit të fëmijës në atë moshë. Kjo nuk ka qenë në vëmendjen e prindërve të mi. Shumë gjëra ndodhin, prindërit nuk i dinë. Unë e kam shkruar që prindërit, nënat, baballarët, por edhe fëmijët të kenë një zë në atë moshë. Problemi tek ne është se shumica e prindërve besojnë se dinë më shumë se fëmijët. Nuk i japin fëmijëve një liri, që t’u tregojë prindërve një traumë në të cilën ata që në atë moment mund ta kapin”, ka treguar Toni.
Ai tha se prindërve këtë gjë ia ka treguar shumë vonë, pasi ka vijuar jetën e tij që sot po e shijon krah një kardiologu. Toni prezantoi edhe partnerin e tij Todorche Stamenov, kardiolog në Londër me të cilin kanë kurorëzuar dashurinë e tyre në fejesë.
“Ne u njohëm në vitin 2015, unë isha në dasmën e nipit tim nga Zvicra në Maqedoni dhe në javë e parë të këtij momenti të jetës sime, unë isha në Ohër me nipërit dhe mbesat e mia. Gjatë kësaj kohe u njoftuam përmes rrjeteve sociale dhe filluam të bisedojmë. Takimi ndodhi pas dasmës në Shkup. Së pari kur u njohëm në Shkup ishte një moment i pabesueshëm. Për shkak se unë punoj dhe me botën shpirtërore, shëroj njerëz. Në momentin që u takuam shpirti i nënës së Todorche që kishte ndërruar jetë para 8 muajve ishte prezent afër meje dhe fillova të dëgjoj mesazhet e shpirtit të nënës së tij dhe kjo krijoi nje shok të madh tej Todorche sepse trurin e ka nga ana e shkencës dhe jo nga ana shpirtërore. Në ato momente një njeri tepër konfident, u bë një fëmijë i vogël që filloi të qante për shkak se kohën kur u takuam, ai ishte në emocione të vdekjes së nënës,”– tha ai.
Toni ka treguar se amaneti i fundit i nënës së tij ka qenë që të bëhej me fëmijë.
“Ne të dy dëshirojmë fëmijë, jemi njerëz që kënaqemi me fëmijë dhe mesazhi i fundit i nënës sime ishte që unë të kisha fëmijë. Por është edhe dëshira ime dhe dëshira e Todorche dhe ka shumë mënyra në të cilën njerëzit sot mund të kenë fëmijë, posaçërisht çiftet që vijnë nga i njëjti seks,”– përfundoi ai.
