Drejtori i Përgjithshëm i Organizatës Botërore të Shëndetësisë (OBSH) Tedros Adhanom Ghebreyesus ka paralajmëruar vendet të heqin dorë nga qasja “ne të parët” për vaksinat.
“Nga 225 milion doza vaksine që janë administruar deri më tani, shumica dërrmuese janë shpërndarë në një pjesë të vogël të vendeve të pasura dhe prodhuese të vaksinave, ndërsa shumica e vendeve me të ardhura të ulëta dhe të mesme i duhet të presin,” tha Ghebreyesus.
“Qasja “ne të parët” mund të jetë në funksion të interesave politike afatshkurtra, por është vetë-shkatërruese dhe do të çojë në një rimëkëmbje të zgjatur.”
Nuk është hera e parë që Ghebreyesus bën një deklaratë të tillë.
“Duhet të jem i prerë: bota është në prag të një dështimi katastrofik moral – dhe çmimi i këtij dështimi do të paguhet me jetë në vendet më të varfra të botës”, tha ai, ndërsa fliste në selinë e OBSH-së në Gjenevë me 18 janar.
OBSH është bashkë-udhëheqëse e iniciativës COVAX, e cila ka për qëllim shpërndarjen e vaksinave në vendet me të ardhura të ulëta të cilët nuk mund t’i blejnë ato nga prodhuesit.
