Ish-Zonja e Parë e Shteteve të Bashkuara të Amerikës, Michelle Obama, do të nisë së shpejti një emision ku do të tregojë aftësitë e saj në gatim. Seritë e “Waffles + Mochi” do të nisin në platformën Netflix më 16 mars.
Sipas mediave të huaja, Obama jo vetëm që do të marrë pjesë në këtë program, por gjithashtu do të mbajë rolin e producentes ekzekutive të “Waffles and Mochi”.
Drejtuar një audience shumë të re, programi ka si personazhe dy kukulla, Waffles dhe Mochi, dhe Obama si një sipërmarrëse, të cilët ndjekin një udhëtim drejt të qenurit kuzhinierë profesionistë.
Ndërkohë tematika e shfaqjes ngjason me fushatën “Let’s move” që Obama ka ndërmarrë për frenimin e obezitetit te fëmijët. Si një nga platformat e saj, ish-Zonja e Parë synon që të rrisë iniciativat që ndihmojnë familjet të konsumojnë ushqime të shëndetshme dhe të promovojë aktivitetin fizik.
“Në shumë mënyra, ky program është një zgjerim i punës sime si Zonjë e Parë mbi shëndetin e fëmijëve, dhe të jem e sinqertë, do të dëshiroja që një program i tillë të ishte transmetuar dhe në periudhën kur vajzat e mia ishin të vogla”, ka shkruar Michelle Obama në rrjetin social “Instagram”.
View this post on Instagram
