Shoqata e Infermierëve të Shqipërisë, përmes disa postimeve në FB, ka njoftuar se brenda 24 orëve të fundit kanë ndërruar jetë 3 infermierë si pasojë e Covid-19. Infermierët që humbën jetën janë Nermim Vaço nga Mati, Lindita Peshku e cila punonte si infermiere e poliklinikës Nr1 e konsultorit të fëmijëve dhe infermiere Erjola nga Lushnja.
“Si pasojë e Covid-19, ditën e sotme është ndarë nga jeta një infermier nga Mati Nerim Vaçi. Shoqata e Infermiereve i shpreh ngushëllime familjes dhe kolegeve” ishte njoftimi i parë nga shoqata.
“Sërish humbje jete mes Infermiereve nga covid-19. Infermierja nga Lushnja ka ndërruar jetë pas betejës me këtë sëmundje. Shoqata e Infermiereve i shpreh ngushëllime familjes se Erjoles”, ishte njoftimi i dytë.
“Bluzat e bardha po përballen çdo dite me virusin dhe po humbasin jetë. Po dje u shua një infermiere e poliklinikës Nr1 e konsultorit të fëmijës Lindita Peshku Qofsh e xhenetit shoqja jonë dhe shpirti jot u prehtë në paqe”, ishte njoftimi i tretë që Shoqata e Infermierëve në Shqipëri ka bërë para disa orësh.
