Ndarja nga jeta e skenaristit dhe regjisorit të mirënjohur shqiptar Kujtim Gjonaj ka shkaktuar pikëllim dhe lot tek familjarët dhe miqtë e tij, por dhe artistët që ndër vite kanë punuar me të.
I biri i Kujtim Gjonaj, Genti Gjonaj ka shkruar në ‘Facebook” një mesazh dhimbje por dhe vlerësimi për të atin duke e cilësuar jo vetëm si idhullin e tij, por dhe gjyshin, babanë dhe bashkëshortin shembullor, të urtë e të dashur.
“Kujtim Gjonaj, babai im, idhulli im, gjyshi i urtë dhe i dashur i fëmijëve të mi, i fëmijëve të motrës, Valbona, dhe vëllait Martin, ndërroi jetë qetësisht në spitalin “Shefqet Ndroqi”. Kaloi me dinjitet shumë peripeci shëndetësore, shumë vështirësi jetësore, dha shumë në jetë, me dijen e vet, humanizmin, vlerat e pamata, por sot në 18.30 datë 28 shkurt 2021, u nda nga kjo jetë.
Ne, femijët e tij, miqtë e tij do t’i japim nesër një strehë tjetër, pranë prindërve të vet që i deshi aq shumë. Ceremonia e varrimit do të jetë nesër në orën 14.00, në Sharrë, duke u nisur nga shtëpia e funeralit Alba, tek Medreseja. Nderimet për të, në një moment të dytë dhe gjithë jetën. Me peshën e një kumti kaq të dhimbshëm, ju falënderoj për mesazhet e ngushëllimit… Ju ardhshim për gëzime..”, shkruan i biri.
