Mjeku Vasil Llajo, ka folur në emisionin “Hipokrati” në lidhje me koronavirusin, ndërsa situata në vend vijon të mbetet shumë shqetësuese.
Mjeku u shpreh se në vend, muaji shkurt regjistroi një dyfishim të rasteve të infeksionit, në krahasim me muajin janar dhe dhjetorin.
Ndërsa u ndal te variantet e reja të COVID, veçanërisht te ai anglez, mjeku pranoi se virusi është më infektues, por shtoi se nuk sjell një gjendje më të rënduar të sëmundjes.
Megjithatë, ai paralajmëroi se nuk përjashtohet mundësia që, nëse nuk krijohet imuniteti i popullatës, ky variant të bëhet më i rrezikshëm dhe më vdekjeprurës.
Mjeku shtoi se momentalisht mutacioni është i përballueshëm dhe se nuk është në stadin për t’u alarmuar.
“Deri më tani thuhet se mutacioni anglez, përveç se është 70% më infektues, kuadri klinik duket se është njësoj. Por nuk përjashtohet që nëse nuk krijojmë imunitetin popullatës, ky shtam mund të bëhet i rrezikshëm, të rrisë numrin e vdekjeve. Por jemi në një stad që nuk është për t’u alarmuar pasi duket një mutacion i përballueshëm”, tha ai.
