Të shtëna me armë janë raportuar në Kukës, ndërsa një person është vënë në pranga, njoftoi këtë të Shtunë policia.
Burime zyrtare bënë me dije se dyshohet që është qëlluar në ajër me një armë zhurmuese, pas një konflikti mes dy personave. Personi që dyshohet se ka qëlluar, një 18-vjeçar, është vënë në pranga.
Ngjarja
Blutë e Kukësit bënë me dije se policia, pas një telefonate të marrë për një konflikt mes dy shtetasve, menjëherë ka shkuar në vendin e ngjarjes.
Forcat “Shqiponja” kanë rrethuar perimetrin e sigurisë dhe kanë bërë të mundur kapjen e shtetasit Gilbert Shatri, 18 vjeç, banues në Kukës.
Ky i fundit, në lagjen nr.1 në qytetin e Kukësit, pas një konflikti për vendin e parkimit me shtetasin Xh.Sh., ka qëlluar në ajër me armën e llojit pistoletë e dyshuar zhurmuese.
Në cilësinë e provës materiale u sekuestrua arma e llojit tip pistoletë e dyshuar zhurmuese, si dhe një gëzhojë.
Gilbert Shatri është shoqëruar në Komisariatin e Policisë Kukës, për veprime të mëtejshme procedurale, shtuan të njëjtat burime.
