Komiteti i Ekspertëve bëri me dije këtë të Enjte se deri në një njoftim të dytë, do të mbeten në fuqi masat e marra deri më tani, për parandalimin e përhapjes së COVID.
Kështu, mbetet në fuqi kufizimi i lëvizjes nga ora 20:00-6:00. Gjatë kësaj periudhe, baret e restorantet po ashtu do jenë të mbyllura. Për lëvizje gjatë kësaj fashe kohore, nevojitet leje që merret përmes portalit e-Albania.
Shkollat e mesme që deri më tani kanë vijuar mësimin online, do të procedojnë ende në këtë mënyrë. Edhe universitetet do mbeten online.
Po ashtu, fluturimet me Britaninë e Madhe do mbeten të pezulluara.
Zëvendësministrja e Shëndetësisë, Mira Rakacolli tha se “kemi vënë re tendencë ulje për indikatorin R0. Konkluzioni është që masat po japin efekt, ndaj do të vazhdojmë të mbetemi aty”.
Drejtoresha e ISHP, Albana Fico tha se incidenca dyjavore, edhe pse mbetemi në transmetim komunitar të gjerë, ka një tendencë ulje. Fico bëri apel për respektimin e rregullave të vendosura nga autoritetet për parandalimin e përhapjes së koronavirusit.
“Ajo që dua të sjell në vëmendje ka qenë që moshat kanë ndryshime dinamike. Moshat 24-35, 45-54 kanë një shtim të numrit të rasteve. Nëse do duam ta vlerësojmë ndryshimin dinamik të përfshirjes së mostrave nga dy javëshi pararendësi, moshat nga 24-35, 45-54 janë 79% e rasteve pozitive. Prekja e këtyre moshave ka ndryshuar dhe mund të ndryshojë vetëm nëse ne do të jemi shumë të kujdesshëm jo vetëm me implementimin e masave të thjeshta, për rregullat e vendosura, por mendoj që kjo është dhe një apel për të qenë të qartë që nuk e kemi përfunduar këtë betejë”, u shpreh.
