Elton Debreshi pritet të zyrtarizohet nga KQZ si kandidati i pavarur për deputet në zgjedhjet e 25 prillit.
Debreshi do të kandidojë në Qarkun e Dibrës, ndërsa sot janë depozituar në KQZ dokumentet e nevojshme, ku përfshihen edhe firmat mbështetëse të qytetarëve për Debreshin.
Debreshi është kryetar i Sindikatës së Minatorëve të Bulqizës dhe pritet të jetë i pari kandidat për deputet nga rradhët e minatorëve.
Debreshi tha se synon që të çojë përpara zgjidhjen e problemeve jo vetëm për minatorët, por edhe të banorëve të qarkut të Dibrës.
“Prej vitesh kërkojmë statusin e minatorit dhe nuk miratohet. Kemi depozituar kërkesën me 11 mijë firma, ndërsa Ministritë ia hedhin topin njëra-tjetrës dhe miratojnë ligje vetëm për rentën minerare që s´ka lidhje fare me problemet e minatorëve. Në kushte të tilla ne minatorët kemi vendosur që në 25 prill të kandidojmë me një kandidat të pavarur”, tha Debreshi, pasi dorëzoi në KQZ dokumentacionin e nevojshëm për regjistrim.
