Ka nisur mëngjesin e sotëm, në stadiumin Air Albania, procesi i vaksinimit personaliteteve mbi moshën 80 vjeç. Personi i parë, i cili ka hyrë për të bërë vaksinën është aktorja Tinka Kurti. Gjithashtu pritet që të vaksinohet edhe ish-Presidenti Alfred Moisiu, artisti Sherif Merdani, aktorja Margarita Xhepa, ish-Kryeministri Aleksandër Meksi, regjisori Pirro Milkani etj.
Ndërkohë nga Elbasani, Kryeministri Edi Rama i ka cilësuar si aspak të denja reagimet lidhur me vaksinimin e personaliteteve.
Rama tha se këta qytetarë kanë dhënë shumë nga vlerat e tyre dhe ne nuk duhet të kujtohemi për ta kur ndahen nga jeta. Gjithashtu Kryeministri tha se do të vaksinohen edhe njerëzit e zakonshëm.
“Bëhet fjalë për të filluar vaksinimin me disa personalitet që janë 80-vjeçare për të dhënë një mesazh përkujdesjeje për ta sepse shoh njëfarë sëkëlldie që kur këta njerëz ndahen nga jeta ka një rrjedhje fjalësh për ta dhe nuk ma ha mëndja që do të dukeshim më bukur nëse ne do të duhet të përballeshim me humbjen e tyre për shkak të mungesës së vaksinës.
Po ashtu fushata e vaksinimit ka një aspekt tjetër që është edhe sensibilizimi i atyre që mendojnë se vaksina është e dëmshme.
Pra fillojmë më kategorinë e 80-vjeçare por janë të parët në një ditë ku do të vaksinohen edhe të tjerë që janë njerëz të zakonshëm, por fillon me ta si një mënyrë simbolike. Është bërë një reagim i padenjë, mizerabël nga njerëz që kanë mundësi të komunikojnë më publikun duke u përpjekur të shfryjnë mllefin ndaj qeverisë”, tha Rama.
Në fakt, Kryeministri, por edhe ministrja e Shëndetësisë, Ogerta Manastirliu, nuk kanë dhënë kritere se çfarë ato konsiderojnë personalitete.
Ka shumë emra që janë personalitete në fusha të caktuara, që janë mbi 80 vjeç, dhe për arsye të ndryshme, kanë zgjedhur të qëndrojnë të tërhequr në jetën publike të vendit. Nuk dihet nëse Rama, Manastirliu apo cilido tjetër që ka hartuar listat e personaliteteve, ka të dhëna për këto qytetarë, apo thjesht po vijohet me show dhe propogandën.
