Everton ka fituar derbin ndaj Liverpoolit duke i mundur 0-2 në “Anfield”. Humbja e katërt radhazi në kampionët për “The Reds” dhe e katërta radhazi në shtëpi.
Fitore e mrekullueshme e Everton, që merr tre pikët në mitikun “Anfield” pas plot 22 vitesh. Skuadra udhëtuese shënoi në fillim dhe në fund të ndeshjes. Richarlison mori një asist të bukur nga James Rodriguez në minutën e tretë dhe mposhti patriotin Alisson me një diagonale të saktë.
Golin e qetësisë e realizoi Gylfi Sigurdsson shtatë minuta përpara fundit. Islandezi ktheu në gol një penallti dhe vulosi suksesin 0-2 të Evertonit.
Skuadra e Klopp ndodhet në një krizë të thellë në Premier League, duke regjistruar kështu humbjen e 4 radhazi.
