Nënkryetari i LSI-së Petrit Vasili deklaroi sot në News24, në rubrikën “Opinion” se realiteti në të cilën ndodhet pandemia kërkon veprime konkrete. Vasili foli për një situatë të rënduar për shkak të COVID-19, ndërkohë që sipas tij nga qeveria ka më shumë fjalë se veprime.
“Me referimin e kryeministrit ne duhet të kishim disa dhjetëra mijëra vaksina dhe tani në shkurt duhet të kishim disa dhjetëra mijëra të tjera. Kryeministri të flasë pak e të punojë shumë. Të gjithë qytetarët para vaksinimit janë të barabartë. E drejta për t’u shëruar është e drejtë për të tërë. Përgjigjja tek 70% e shqiptarëve se ku do shkojë vaksinimi nuk e kemi. Dallojmë një gënjeshtër pas radhës. 900 vaksina zgjatën 3 javë, 25 njerëz në ditë”, tha Vasili.
Ai u shpreh se qeveria nuk dëgjoi sugjerimet e opozitës dhe se Shqipëria është i vetmi vend që rritet në shifrat e COVID-19.
“Kam pasur disa evenimente të mëdha gjatë punë sime. U refuzuan, nuk kemi pse të bëjmë testime tha kryeministri. Ndërkohë që gjithë bota bënte testime për të njohur realitetin dhe masat të mos ishin idiote. Që nga masat e forta rritja është me 60-70%.
Shqipëria i vetmi vend që vetëm rritet. Nuk dëgjuan për këtë gjë. U kërkuam publikisht, i gjithë shërbimi shëndetësor të jetë ai vijë e parë, jo Spitali Infektiv vijë e parë. Çfarë ndodhi, e refuzuan publikisht dhe thanë 127 është e vetmja zgjidhje e jona.
Thanë ashtu, u dha koha të drejtë? Një përballim i suksesshëm i pandemisë do ishte një bonus për qeverinë”, tha nënkryetari i LSI.
Ai akuzoi madje për fshehjen e vdekjeve. “U kërkua bëni analizën e vdekjeve, shkuan me idenë që nuk do i nxjerrim, por do i fshehim. Nuk raportojnë rreth 5 mijë vdekje. Nuk jam kritik në emër të politikës, por në emër të profesionit”, tha ai.
Vasili deklaroi se situata nuk është nën kontroll dhe se fatura e COVID është 100 e ca milionë euro për qytetarët.
“Është dëgjuar gjithmonë që kanë thënë situatën e kemi në kontroll. Ju kemi thënë që nuk e keni në kontroll, është situatë kaotike. Shkenca të imponon rrugë të detyrueshme. Ndërkohë që ne flasim mijëra të tjerë infektohen. Unë për shkak të profesionit kam telefonata pafund të cilët kërkojnë ndihmë sepse infektimi është në masë. Përballen të gjithë me pamundësi financiare serioze. COVID kushton, kushtojnë ekzaminimet, trajtimet. Deri tani 100 e ca milionë është fatura. 110 mijë euro janë rimbursuar. Këto janë çështjet e mëdha që ne hedhim në tavolinë dhe nuk marrin përgjigje, por ka vetëm propagandë”, deklaroi Vasili.
