Zbardhen detaje të reja nga hetimet për ryshfet në radhët e sistemit shëndetësor pas arrestimit të mjekut Edvin Prifti.
Burimet bëjnë me dije se mjekut Edvin Prifti i është gjetur një bllok ku janë listuar disa emra, të cilëve dyshohet se u ka marrë para kundrejt mjekimit.
Mësohet se blloku me një listë emrash është gjetur gjatë kontrolleve të Policisë në banesën e mjekut Edvin Prifti.
Nga organi i akuzës nuk ka ende një informacion në lidhje me materialet e sekuestruara në banesën e mjekut
Ndaj mjekut Edvin Prifti, Gjykata kundër Korrupsionit dhe Krimit të Organizuar vendosi masën ‘Arrest në burg’.
Pak muaj para arrestimit me akuzën e korrupsionit dhe pastrimit të parave, shefi i Kardiologjisë në QSUT, Edvin Prifti, kishte denoncuar në polici dhe prokurori kërcënime të bëra ndaj tij për shkak të detyrës.
Ai akuzonte për kanosje Leonard Selmanajn. Ky person po hetohej nga prokuroria e Tiranës pasi përmes mesazheve e telefonatave i kërkonte Edvin Priftit kthimin e një shume monetare që pretendonte se i kishte dhënë për operimin në zemër të një të afërmi.
Rasti i mjekut u zbulua nga përgjimet e rastit që solli arrestimin e gjyqtares së Krujës Enkeleda Hoxha.
Ndërkohë, avokatët e mjekut Edvin Prifti kanë dorëzuar në Apel kërkesën për ndryshimin e masës së sigurisë. Avokatët kërkojnë masë më të butë se ajo e arrestut në burg, ndërsa burime nga SPAK thonë se po hetohen 3 denoncime të reja për mjekun. Ankim pritet të dorëzojnë edhe avokatët e gjyqtares së Krujës, Enkelida Hoxha, avokatit Aldo Tabaku dhe të ndaluarve të tjerë.
