Nënkryetari i LSI, Petrit Vasili deklaroi sot se, opozita ka një plan shumë të mirë detajuar për një ristrukturim, për një plan të emergjencave civile tërësisht të ri.
“E tërë Shqipëria ka qenë e mbërthyer nën darën e borës e të kohës së keqe dhe njëherazi ka parë qartë që nuk ka qeverisje, nuk ka kryeministër, nuk ka agjenci shtetërore që t’iu gjendjen atyre pranë dhe drama e mijëra e mijëra njerëzve në rrugët e Shqipërisë, në të ftohtë e në acar, pa asnjë ndihmë e pa asnjë mbështetje, të lënë në mëshirë të fatit, ka qenë një dramë që është konsumuar në sytë e të gjithëve”, tha Vasili.
“Është fare e qartë për të gjithë se Edi Rama që është Kryeministri i Shqipërisë vazhdon të mbetet demagogu më i madh i të gjitha kohërave, njeriu i cili përveç propagandës, në esencën e tij nuk përfaqëson asgjë për shqiptarët”, u shpreh ai.
Vasili shtoi se, “është e qartë që opozita ka një plan shumë të mirë detajuar për një ristrukturim, për një plan të emergjencave civile tërësisht të ri, nga rrënjët të ndërtuar, nga themelet të ndërtuar nga e para, sepse Shqipëria përballet me emergjenca civile dhe nuk mund të jetë kurrë në mëshirë të fatit”.
“Ky plan i detajuar do të krijojë një rritje institucionale të emergjencave civile, një logjistikë ashtu sikurse i takon, me të gjitha mjetet që i duhen, në të tërë komponentët e vetë, që qytetarët kurrë të mos ndihen të vetmuar, për cilëndo qoftë ajo emergjencë civile që atyre iu bie mbi kokë. Dhe të mos jenë kurrë të vetëm dhe të mos e shikojnë veten siç e panë edhe në këto ditë shumë të vështira të dëborës, ashtu sikurse e kanë parë në përmbytje, ashtu sikurse e kanë parë në situatat e tërmetit, ashtu sikur e kanë parë në situatat e djegieve masive në Shqipëri”, tha Vasili.
“Një plan i ri, një mënyrë e re, një ndërtim i ri i të tërë punëve, duke filluar nga emergjencat civile, kjo është ajo që opozita do të bëjë nesër në qeverisjen e vendit për të harruar njëherë e përgjithmonë eksperiencën e shëmtuar të Edi Ramës në pushtet”, theksoi Vasili.
